鄭秀文演唱會第10場，柳應廷自製盲盒扭蛋機，褲袋攞公仔送Sammi被笑似求婚。Jer單拖做嘉賓認緊張，Sammi鼓勵：我覺得你今晚表現相當之好。

鄭秀文（Sammi）24日在 紅館 舉行第10場

「You & Mi 鄭秀文世界巡迴演唱會2023」（Rescheduled ），換了牛仔晚裝新戰衣的Sammi，在台上風騷自轉，問觀眾：「今日我著咗牛仔裝，正唔正呀？轉個360度畀你睇嚇，係咪好婀娜多姿呢？」觀眾大叫好索。

接著Sammi介紹嘉賓出場，「今晚呢位嘉賓，新與唔新之間，都算新，出道咗幾年，佢嘅唱功毋庸置疑，非常之好。幾位嘉賓不約而同都要同我合唱呢首歌，唔知點解呢？」

音樂響起《不要驚動愛情》，Jer （柳應廷） 升上舞台，兩人擁抱拖手繞台合唱，氣氛high爆。

5年前，MIRROR 初出道首次踏上紅館，就是獲Sammi邀請任個唱嘉賓，昨晚Jer單拖上陣，坦言好緊張，「上次12個人，成班傻更更，有班兄弟喺身邊陪住，今次得自己一個人特別緊張。今日綵排，同老師練咗好耐，和音同埋點樣分段唱好啲。」Sammi見到Jer好緊張，叫觀眾給他掌聲鼓勵：「諗番自己以前去一個咁大舞台，都會好驚同腳震，但我覺得你今晚表現相當之好。」

Jer為答謝Sammi給機會，配合她的新歌《盲盒》，自製一個「愉快盲盒扭蛋機」送給她，「其實我原本想整薯片包，畀COLLAR整咗呀！」他咬牙切齒，非常搞笑。

又說：「時間關係，呢度已經有一隻扭蛋。」Sammi見他從褲袋拿出小扭蛋，笑說：「好似求婚咁，要送我首飾！」

Jer大笑，「入面係...」Sammi望著眼定定說：「嘩，我老花喎，咁細！哦，公仔嚟嘅！」原來是Baby MIRROR的Jer公仔，Sammi笑說：「蝦我老花，好Cute，大過粒鼻屎！」全場爆笑。Sammi將迷你Jer放入裙袋，然後落台。Jer獨唱由馮允謙作曲的新歌《約齊靈魂在墳墓前開生日派對》。

Encore時，Sammi型格登場唱新歌《盲盒》，其間不斷收禮物打亂了拍子，她立即要求重唱。有觀眾送上寫了「金像獎影后鄭秀文」的肩帶，Sammi立即戴上身，風騷轉圈讓觀眾欣賞。完騷後，Sammi孭住「薯片斜孭袋」到紅館外為Fans簽名和收禮物，幾百Fans歡呼吶喊，非常熱情。而昨晚捧場好友包括車婉婉與囝囝、Cookies成員吳雨霏Kary和區文詩Angela、岑寧兒YoYo、陳詠謙等。